Në kujtim të udhëheqësit shpirtëror

Jetëshkrimi dhe Veprat | Ceremoni të hapjes së Teqeve Halvetiane të Shqipërisë | Rindërtimi i Asetanes
Konferenca Kombëtare Aleviane | Këngë  kushtuar Sheh Muamerit
Ceremoni të tjera fetare | Shkëmbime vizitash | Video
Gjeneza e Tarikatit tё Lartё Halveti | Sheh Ahmet Pazari

Rindërtimi i Asitanes (Teqes së Madhe)
me Tyrben e Azizëve të Tiranës

Rindërtimi i Asitanes ( Teqes së Madhe) me Tyrben e Azizave të Tiranës, mbeti për mua detyra kryesore. Të rrënuar nga diktatura komuniste, si gjithë institucionet fetare, u shndërrua nga një lulishte në një vend ferrash e plehrash. Për rindërtimin e këtij institucioni 400 vjeçar, që është mëmë për 200 Teqet, u përpoqa shumë dhe gjeta pengesa nga më të ndryshmet. Fillimisht u përballa me  qeverinë, akoma komuniste, me President Z. Ramiz Alia. Në këtë periudhë erdhi dhe Z. Hajdin Sejdia, hapi gropën e madhe, e quajtur Hollding, duke rrezikuar Tyrben e shenjtorëve.  Për këtë u mundova dhe u përballa me qeverinë, e cila i kishte dhënë dorën e lirë kësaj firme me predispozicionin për ta ndihmuar, pa marrë parasysh asgjë. Me përpjekjet e jashtëzakonshme arrita të siguroj vendin e shenjtë, por  të gërshetuar sipas planit urbanistik të kësaj firme. Kjo arritje erdhi dhe me Partinë Demokratike, me kryetarin e saj Z. Sali Berisha, i cili ndërhyri në qeveri dhe urbanistikë, për të mbrojtur këtë vend. U bënë përpjekjet e para për ndërtim.  Instituti i Monumenteve, me drejtorin e saj, Z. Arapi, inxhinierin e zbatimit Z. Dashi, si dhe me punëtorët filluan gërmimin për të zbuluar  Tyrben e vjetër, e ndërtuar qysh në vitin 1605.

Ky ishte hapi i parë i punës për ndërtim, në konturin e themeleve të saj. Erdhi koha e ardhjes në pushtet të Partisë Demokratike. Ndihma për të lejuar këtë institucion fetar të ngrihet, u dha konkretisht. M’u dha e drejta e ndërtimit. Ilir Manushi, Ministër i Ndërtimit dhe Urbanistika studjuan vendin për zbatim. M’u dha e drejta e rrethimit dhe këtë e realizova me parmakë hekuri, të cilët në atë kohë arritën me betonimin dhe saldimin e tyre rreth 200 mije lekë të reja. Kjo ishte një shumë e madhe. Por njerëzit dashakeqës i shkulën, i prenë, dhe i ngritën brenda natës të gjitha hekurat. Zoti gjykoftë në dënimin e tyre. E them me keqardhje, ndoshta si fetar, sepse njoh mallkimin e Zotit, që është shfaronjës në breza. Rrethimi i dytë i teritorit të Teqes, që është ekzistues dhe sot,  e bëra me blloqe betoni. Së bashku me dy portat e mëdha të hekurta arriti shumën 600 mijë lekë të reja.

Fillimi i ndërtimit të themeleve të Tyrbes

Për nisjen e themeleve të Tyrbes dhe një pjese të Teqes Halvetiane u mblodhën dashamirët dhe fetarët e kësaj Teqeje. Në vendin, ku do të ndërtohej Tyrbja u therën bagëti, sipas zakonit, u shtrua dhe një drekë për pjesëmarrësit.

Sheh Muameri bën duanë e rastit së bashku me pjesëmarrësit e kësaj ceremonie

Kush ma dha këtë forcë për të përballuar gjendjen e krijuar shumë acaruese, lakmuese dhe tendencën shtazarake të njerëzve, kundra ndërtimit të këtij vendi të shenjtë?! Kjo, nuk është me fjalë, por me vepra të regjistruara në mënyrë të habitshme, në të gjitha instancat qeveritare. Edhe me dashtë me i shlye nga kujtesa nuk mundesh. Si munda këtë furtunë të ashpër dhe të gjithanshme, për të cilët flasin faktet, t’i përballoj?! Ky ishte amaneti i babës, që ia dha të birit, të cilin e bekoi me frymën dhe veshjen e Shehut të ardhshëm. Unë, i devotshëm për këtë detyrë, do ta zbatoja këtë amanet mbi të gjitha interesat materiale.

Përpara babës, kur ai më shikonte dhe më studjonte mua, dhe unë shikoja atë dolën fjalë të habitshme, të pathëna dhe shfaqur hapur. Ndërmjet tyre m’u dha amaneti tek për tek, dëshmitar është vetë Zoti për dorëzimin e Teqes. Kjo ndodhi para vdekjes së tij, në regjimin e Enver Hoxhës, duke qenë gjallë vetë diktatori, i cili e dënoi me vdekje dhe pastaj për fat përfundoi në burgun e tmerrshëm të Burrelit.

Babai im më drejtohet me fjalën e tij të zemrës, duke më thënë:

“Siç më la baba im, ashtu dhe unë Ty, po të lë në dorëzim Teqen.”

“ Emaneten min indi-l-lah.” (porosia është në huzur, Prezencën e Zotit)

Në Kuran thuhet: “Premtimin zbatoje, pse për premtimin ke përgjegjësi.”

Prandaj çdo gjë do të marrë rrjedhjen që ka edukuar vetë Zoti, kushdo që mundohet ta shtrembërojë, gjen dënimin (adhabin) e Zotit.

Një pjesë e Teqes, që po ngrihet

Shko lart